تصحيح فكرة اخوانا الافاضل

الناس تعتقد ان القناعه و القبول و الرضا و العفويه كسل عندنا نحنا اهل هذا البلد الطيب المعطاء سودان العزه و الصمود : ياناس الارض الشعب السودانى شعب بسيط و يحب القناعه و اذا توفرت ليهو اقل سبل الرفاهيه يكون راضى جدا و مبسوط :بعدين بلدنا واسعه و خيرا كتير و يكفينا كلنا براحه عشان كده الناس منمهله جوه السودان ناس رزق اليوم باليوم و ناس الله كريم و ناس فراجا فوق لكن اعزائى و احبتى و بشهود جميع خلق الله فى هذه الدنيا من عرب و عجم كل انواعهم هل يوجد سودانى من السودانيين الشغالين معاهم فى الغربه مجر ان يوصف بالكسل او حتى اى حاجه ذى الكسل يعنى مشتقاتو بالعكس هو الذى يوكل اليه المهم من الزاد يعنى فى جماعه محل ثقه فى التفانى و الامانه و الامثله مابتتعدا و شهد شاهد من اهلها : و لما جيت من ذى ديل كان اسفاى وا مأساتى وا زلى

طبعاً موضوع الكسل دة سببة..... المصريين لغاية فى نفوسهم لان السودانيين اكثر منافس ليهم فى سوق العمل والناس بتفضل السودانيين للكفاءه والاخلاص

[size=18]لك التحية الاخ عوض

تصور كيف يكون الحال لو ماكنت سوداني واهل الحارة مااهلي ....

كلامك صاح ... وانا قبل فترة دخلتا احدي المنتديات العربية

و اول موضوع قراته كان نكات عن كسل السودانين

وعاتبت كاتب الموضوع واعلنت مقاطعتي للموقع

واعتزر لي كاتب الموضوع وقال هذة نكات متداول عن كل شعوب الارض .

انا عن نفسي شايفة انو جزء كبيبر مننا كسلانيييييييين وتعال اضرب ليك الامثال :ـ

* من الصباح تلقي الرجال قاعدين في البنابر جنب ستات الشاي لغاية الساعة 9ص .
* في المناسبات الناس تقعد يومين وثلاثة .

* حتي العمالة في السودان بقت اجنبية .

* اراضينا خصبة وراقدة ونستورد في الثوم والدكوة من الصين .

اكيد ماكلنا كسلانين لكن الخير يخص والشر يعم ..

لك الشكر والتحية ..

عزيزتى ايمان بعد التحيه فى ردك على الموضوع ده شوية تعليق بس :الخير يخص دى ما الكلام عشان بعض الناس ذى ده ما عندهم يعنى بس السودانيين كل كسل الدنيا فيهم كل السودانيين اى واحد منهم بمعنى انو الحكايه جابت حزازيات الله يسامحهم : انا حاولت اظهر الوجه التانى للخصله دى انها مافينا : الله يسدد خطاك

ليك التحية عوض على طرح هذا الموضوع
لكن للأسف لو السودانين يشتغلو نص الذمن الفى الغربه فى السودان حينصلح الحال لكن فى السودان للأسف فعلاً فى كسل شديد اذا مشيت اى مصلحه حكومية عشان تكمل اى معامله حتلقى ناس مشوا الفطور وما جو وواحديين بيقرو فى الجرايد وواحد لم يحضر عشان اسباب لاتذكر الخ....
دا الواقع فى السودان ومن هنا جا كلام انو السودانيين كسلانين عكس اى سودانى فى اى بلد تانى نشاط وشغل والتزام اذا وجد نصفه لصلح حال السودان.
طبعاً الكلام لا يشمل الكل وانت ذكرت انو الخير يخص والشر يعم حقو ناخد وقفه شويه.
ولا رايكم شنو اسرة المنتدى

الاخت راشيل انا اعتقد ان اسباب التسيب فى السودان هو سؤ ادارة وعدم وجود المحاسبةمن المسؤلين وتفشى الجودية فى وسط المجتمع السودانى والتعلل بضيق العيش انما فى بلاد الغربة انت محاسب على كل صغيرة وكبيرة .

الاخوة والاخوات الاعزاء
ياجماعة انا عايز اسالكم سؤال ليه السودانيين في بلاد الغربة شغلهم غير عن شغلهم في السودان
يعني في بلد الغربة تلقي السوداني يتقبل شغل( الدوامين والشفتات) عادي ومن غير اعتراض عكس في السودان . هل زي مابيقول الكثير ( المعايش جبارة ) ام سوء الادارة وعدم المحاسبة من المسؤلين كم قال الاخ موافي .

كان عندى موضوع اود تخليصه فى الدوائر الحكومية تعذبت فى كل الدوائر بسبب تسيب الموظفين ما عدا وزارة الطاقة خلصت الموضوع فى خلال ساعه استلمت التصديق موقع من مدير الادارة والسبب انه فى وزارة الطاقة الوزير السابق عوض الجاز كان صارم وبيحاسب المقصرين يعنى الموضوع مش كسل الموضوع سؤ ادارة وغياب المحاسبة وكل انسان اذا حس انه غير محاسب فسوف يتسيب.

كلامك صاح ياموافى ولك كل احترام لكن مع عدم وجود مراقبة ومحاسبة صراحه هنالك بعض الكسل وانا ذكرت انه الشر يخص والخير يعم لكن ليس معنى هذا ان السودانيين كسالا بطبعهم بل بالعكس هم من انشط الشعوب وهذا بشهادة كثير من باقى الشعوب لكن الفاكهة الفاسده تفسد منظر سلة الفواكه باكملها
ياريت يكون حال باقى الوزارات مثل وزارة الطاقه ونرجو غياب الوزير السابق عوض الجاز لايكون ذا تاسير سلبى

التحية لكل الأعضاء
وبخاصة الأعضاء المتداخلين في الموضوع
وتحية خاصة للأخ عوض جاهوري الذي أثار الموضوع
أراني سعيد أن الموضوع حظي بقبول من المتداخلين
بدليل هذه المداخلات والآراء المختلفة والمتباينة
وفي النهاية اختلاف الرأي لا يفسد للود قضية
وإن كان هناك عيب فينا
فالاعتراف بالعيب والخطأ
أول خطوة في سبيل تصحيح هذا الخطأ
ولكم التحية